අලියෙකුට හොඬවැලක් ඇත්තේ ඇයි ? ?

අශ්වයන්, ගවයන්, සුනඛයන් හා බළලුන් වැනි සිවුපාවන්ට මුඛයක් පමණක් ඇති නමුත් විශාල සිව්පාවෙකු ලෙස සැලකෙන අලියාට පාද සතරට හා මුඛයට අමතරව හොඬවැලක් ද ලැබී ඇත. 

අලියාගේ හොඬවැල විවිධ කාර්‍යයන් සඳහා භාවිතා කළහැකි අපූරු අවයවයකි. අලියාගේ හොඬවැල ඇට රහිත මස් වැදැල්ලක් වුවද එය ඉතාමත් ශක්තිමත් ය. විශාල දැව කඳක් වුව අලියාට ස්වකීය හොඬවැලෙන් ඉතා පහසුවෙන් ඔසවාගෙන යා හැකිය. හොඬවැල ඕනෑම අතකට නැවිය හැකි, පැද්දිය හැකි, උඩට එසවිය හැකි අවයවයකි. ඒ සඳහා හොඬවැල පේශීන් 40,000ක් පමණ උපයෝගී කරගනී. 

හොඬවැල මඟින් මහා විශාල වෘක්ෂයක් ඇද දමා පෙරළිය හැකිවා මෙන් ම ඔබේ අතේ තිබෙනා කුඩා කෙසෙල් ගෙඩියක් වුව බිම නොවැටී අල්ලා ගෙන මුව තුළට ලා ගැනීමේ හැකියාව ඇත. අලියා හොඬවැලෙන් විවිධ ප්‍රයෝජන ගනී. ඉව කිරීමට, වතුර පානය කිරීමට මෙන් ම පොල් අතු, කෙසෙල් කඳන් කඩා මුඛයට ඔබා ගෙන ආහාර ගැනීමට ද අලියා හොඬවැල උපයෝගී කරගනී. ජලය පානය කිරීමේදී පළමුව හොඬවැල දිගේ උඩට උරාගෙන ඉන් අනතුරුව මුඛය තුළට වතුර විදින සැටි ඔබ නිරීක්ෂණය කර ඇතුවාට සැක නැත. තවද හොඬවැල දිගේ උඩට ඇද ගන්නා ජලය වතුර මලක් මෙන් විදිමින් ඇඟපත සෝදාගන්නා සැටි, කුඩා පැටවුන් නහවන සැටි පින්නවල අලි අනාථාගාරය වැනි ස්ථාන වලදී හොඳින් දැක බලා ගත හැකිය.

කිසියම් වස්තුවක හැඩය හා එය උණුසුම්ද සීතලද ආදී දේ අලියා තම හොඬවැල මාර්ගයෙන් වටහා ගනී. කුඩා පැටවුන් තමන් යන මාර්ගයේ දක්කාගෙන යාමටත් දරු පැටවුන් සුරතල් කිරීමටත් ඇතින්න හොඬවැල යොදාගනී. රණ්ඩු සරුවල් කරගන්නා අවස්ථාවල දී පහර දීම සඳහා ද අලියාට හොඬවැල ප්‍රයෝජනවත් වේ.